Мэндчилгээ

about img

           "Эрдэнэт цогцолбор" дээд сургууль нь анх уул уурхайн нарийн мэргэжлийн ажилчид бэлтгэх зорилгоор “Сургалтын төв” нэртэйгээр 1975 онд байгуулагдсанаас хойш 7161 мэргэжилтэй ажилтан,  462 техникумын боловсролтой техникч, 2054 дипломын болон бакалаврын зэрэгтэй инженер бэлтгэж Эрдэнэт үйлдвэр, Эрдэнэт хот, цаашлаад Монгол улсын уул, уурхайн салбарын хөгжилд жинтэй хувь нэмэр оруулсан 45 жилийн баялаг түүхтэй билээ.

           Ш.Отгонбилэгийн нэрэмжит "Эрдэнэт цогцолбор" дээд сургуулийн хамт олон бид Боловсролын магадлан итгэмжлэлийн үндэсний зөвлөлөөр 3 удаа бие даан магадлан итгэмжлэгдсэн мөн MNS ISO 9001:2016 чанарын менежментийн тогтолцоог нэвтрүүлж гэрчилгээ авсан орон нутагт үйл ажиллагаа явуулдаг цорын ганц боловсролын байгууллагад ажиллаж байгаагаараа бахархаж, эрч хүч авч ажилладаг.

            Боловсролын ЧАНАРТАЙ үйлчилгээг инженер, техникийн мэргэжилтэй болох хүсэлтэй хүн бүрд хүргэхийн тулд бид инженерийн боловсролын CDIO санаачилгад нэгдэн үр дүнд суурилсан сургалтын хөтөлбөрүүд боловсруулсан. Бид боловсролын үйлчилгээнийхээ чанарт итгэл дүүрэн байгаа учраас үнэлгээний голч дүн нь 3,2 дээш төгссөн оюутан бүрд ажлын байраар хангах батламж гардуулдаг цорын ганц сургууль юм.

Та бүхнийг манай сургуульд суралцаж боловсролын ЧАНАРТАЙ үйлчилгээ авахыг урьж байна.

Эрдэнэтийн Овооны дэргэд

Эрдмийн Овоо сүндэрлэх болтугай

"Эрдэнэт цогцолбор" дээд сургуулийн захирал, Доктор (Ph.D) Д.Зоригтхүү